Restablecido o Feve entre Ribadeo e Viveiro tras a caída dun coche á vía
Ocorreu nun viaduto de Cervo onde xa se rexistraron polo menos cinco accidentes de similares características nos últimos anos
A caída dun coche en Cervo ao pé da vía do Feve provocou a interrupción do tráfico ferroviario entre Viveiro e Ribadeo. Tras precipitarse dende unha altura duns cinco metros, o condutor foi trasladado en ambulancia ao Hospital da Mariña, en Burela. Ata o lugar tamén acudiron efectivos da Garda Civil e mais os bombeiros do parque viveirense.
"O que nos comunica o 112 é que, como consecuencia dunha saída de vía, hai un precipitado na vía do tren e unha persoa ferida que require asistencia. Ante isto, a dotación sae cara ao punto, e ao chegar os sanitarios xa conseguiran polos seus medios evacuar a vítima, que non estaba atrapada", sinala José Antonio Veiras, sarxento dos bombeiros de Viveiro.
O punto onde se produciu o accidente, próximo ao límite con Burela, é especialmente conflitivo. De feito, trátase xa polo menos do quinto sinistro de similares características que atenderon os servizos de emerxencias no mesmo lugar nos últimos quince anos.
"Revisando o historial, temos constatadas cinco intervencións neste punto, ás que nós acudimos. Que se trata dun punto conflitivo é un feito", engade o xefe de bombeiros.
Precisamente, as barreiras do viaduto desta estrada provincial estaban a piques de ser substituídas por outras novas.
