Rueda destaca "o bo momento" da investigación galega co "reforzo" do investimento
Nun vídeo en redes sociais, o presidente da Xunta asegura que Galicia está consolidánose en sectores estratéxicos como a biotecnoloxía,as enerxías verdes, a intelixencia artificial ou a supercomputación
O presidente da Xunta, Alfonso Rueda, destacou nun vídeo difundido nas redes sociais, o "bo momento" que está a vivir a investigación galega grazas a un maior investimento neste eido e as medidas para reter e atraer talento, o que está a favorecer o recoñecemento da I+G+i a nivel internacional.
“En Galicia innovar non é un eslogan, é poñerlle nome a ciencia que xa está mellorando a saúde, a industria ou a tecnoloxía”, salientou.
Rueda fixo fincapé en que Galicia está a consolidarse en sectores estratéxicos coma a biotecnoloxía, as enerxías verdes, a intelixencia artificial ou a supercomputación grazas a un “ecosistema de investigación único” no que traballan “as universidades, centros punteiros e as empresas” e que contan co apoio do Executivo autonómico.
Como exemplo desta aposta, Alfonso Rueda destaca que xa temos a liña cuántica máis longa de España ou que a nosa comunidade acollerá unha das seis fábricas de intelixencia artificial que se van facer en Europa.
O presidente salienta tamén a creación dunha fundación para atraer 30 investigadores de primeiro nivel a Galicia.
Nesta liña, Rueda asegurou que a investigación galega é bo exemplo da Galicia Calidade que identifica á comunidade en todo o mundo.
