Rueda destaca as obras de mellora en 400 quilómetros de estradas autonómicas
Nun vídeo difundido en redes sociais, asegura que están a investir 54 millóns de euros este ano na rede viaria
O presidente da Xunta, Alfonso Rueda, destaca que a Xunta está executando obras de mellora en máis de 400 quilómetros de estradas de titularidade autonómica para aumentar a seguridade dos condutores e conseguir unha mobilidade máis fluída.
Nun vídeo difundido nas redes sociais, o xefe do Goberno galego asegura que a conservación da rede viaria é unha das prioridades do seu Goberno.
Rueda explica que están investindo 54 millóns de euros este ano en obras nas catro provincias para mellorar firmes, correxir curvas, redeseñar interseccións e reforzar a sinalización.
"Facer estradas novas está moi ben, pero manter e conservar as que xa existen tamén é igual de importante", destaca.
O xefe do Goberno galego pídelles ao resto de administracións que "fagan o mesmo esforzo" no mantemento das estradas que son da súa competencia.
