Rueda cre que a actitude de PSOE e BNG fan “moi difícil” unha solución a Ourense

O presidente da Xunta e líder do PPdeG, Alfonso Rueda, criticou este venres a actitude do PSdeG e do BNG respecto a a gobernabilidade da cidade de Ourense e cre que coa súa actuación é “moi difícil” buscar solución á situación "excepcional" do concello.

Rueda dixo que a postura dos candidatos do PSOE e do BNG á Alcaldía de Ourense, Francisco Rodríguez e Luís Seara, é “difícil de entender”, logo de que estes declinasen acudir á cita exposta polo popular Manuel Cabezas, mentres agardan a que as direccións galegas das súas formacións marquen o camiño a seguir nas negociacións.

Neste sentido, Rueda cre que o PSOE en Galicia “debería aclararse” porque o partido ten unha opinión na cidade, outra na provincia e "agora os responsables autonómicos, se é que os hai, teñen outra".

O presidente da Xunta lembrou que de forma previa aos comicios "estabamos todos de acordo en que a situación de Ourense era excepcional e tiñamos que falar".

Precisamente, en base a iso e visto que “ninguén movía ficha, onte moveuna o noso candidato, Manuel Cabezas, e xa viron vostedes a resposta”.

Para Rueda o PSdeG e o BNG poñen de manifesto que, unha vez máis, “o cordón sanitario a quen llo quere poñer, como noutras partes, é ao PP” e que “Ourense non é unha situación especial”. 

E máis logo de que o propio secretario xeral socialista, Valentín González Formoso, confirmase este xoves o impulso das conversacións co BNG para alcanzar pactos progresistas en todos os lugares onde sexa posible.

O propio Formoso, ao preguntarlle por iso, non descartou que unha das 13 alcaldías que estaban en xogo e nas mesas negociadoras, fose a de Ourense

O PPdeG, aberto a escoitar propostas para as deputacións

Alfonso Rueda tamén valorou o horizonte aberto nas deputacións. Segundo dixo, no PPdeG hai moitos candidatos “que poderían ser ideais para moitos postos”, polo que “se alguén quere facer algunha proposta escoitarémola”. Insistiu en que tamén aí queren que a lista máis votada sexa a que goberne, recordando que foi o seu partido nas catro provincias.

Ao preguntarlle pola posibilidade de que o PPdeG logre máis facilmente o goberno provincial de Ourense cun candidato que non sexa Manuel Baltar, Rueda dixo que a el ninguén lle trasladou esa mensaxe.

“Iso de que é moito máis fácil con outro candidato dio vostede, eu non escoitei ningunha proposta nese sentido”, xustificou, ao tempo que deslizou que “se alguén quere facer algunha proposta, escoitarémola”.

Co nome sobre a mesa de Luís Menor, actual alcalde do Pereiro de Aguiar, que acaba de ampliar a súa maioría absoluta e que é unha persoa próxima ao presidente da Xunta, con quen traballou na mesma consellería, Rueda evitou apoialo.

“Nas catro provincias hai moitos candidatos que poderían ser ideais para moitos postos” polo que, “non imos falar de isto”, nin tampouco doutros nomes ata pasado o 17 de xuño cando se constitúan os concellos. “Imos primeiro cos concellos e logo veremos”, resolveu Rueda.