Rueda compromete o apoio aos galegos do exterior con novas axudas ao retorno
A Xunta destaca que a Estratexia Retorna permitiu o regreso de máis de 36.500 galegos residentes no exterior entre 2018 ata o 2023
O presidente da Xunta, Alfonso Rueda, compromete o apoio do seu Goberno aos galegos do exterior co reforzo da Estratexia Retorna no 2026. O xefe do executivo autonómico presidiu este venres a reunión anual da comisión delegada do Consello das Comunidades Galegas, é dicir, os representantes dos centros galegos da diáspora.
A Xunta destaca que desde que se puxo en marcha a Estratexia Retorna no 2018 ata o 2023, últimos datos dispoñibles, máis de 36.500 galegos residentes no exterior teñen regresado a Galicia. Entre as medidas dese plan hai axudas para afrontar os primeiros gastos de instalarse na comunidade que reciben 1.100 familias cada ano.
Alfonso Rueda explicou que nos presupostos de 2026 a Xunta reforza e amplía as axudas da Estratexia, sobre todo en vivenda e emprego. Haberá apoios para rehabilitar vivendas para retornados e impulsarán o programa para cubrir vacantes en empresas galegas, que xa leva facilitados 400 contratos a galegos do exterior.
"Temos que seguir afinando cousas, tanto aquí, por exemplo o tema da vivenda, que agora é un problema en todas partes, témolo que coidar especialmente. E para os que queiran vir, o tema da empregabilidade é fundamental, e todo o que se está facendo cos empresarios que están desexando recibilos, hai que afinalo máis", remarcou Rueda.
