Rouban móbiles por valor de 9.000 euros nunha tenda de Viveiro

Unha tenda de telefonía da céntrica praza de Lugo, en Viveiro, foi asaltada por varios mozos a cara descuberta. Tras ameazar as dependentas, os atracadores fixéronse con media ducia de móbiles de alta gama, valorados cada un deles nuns 1.500 euros, e marcharon correndo.

"Pasou a policía preguntándonos polas cámaras de seguridade que tiñamos, para ver se captaran algunha imaxe", conta Pilar Corgos, comercial dunha óptica. 

​​​​​​"Vimos correr uns rapaces, pero podía ser alguén que tivese présa. Ninguén pensaba niso, ata que veu avisarnos a rapaza do local", di Ana Fernández, dependenta dunha tenda. 

"Veu a policía e pedíronnos imaxes. As cámaras enfocan cara á porta, e vese por completo a cara de dous dos mozos", engade Noa Martínez, que traballa noutro comercio. 

En total, o valor do botín ascende a uns 9.000 euros. A raíz deste asalto, que está a ser obxecto dunha investigación policial, nos comercios da contorna din estar preocupados.

"Temos un pouco máis de medo. Foi a un veciño, que é como se fose a nós. A policía vén con máis frecuencia, pero parécenos que tiña que estar máis aínda", sinala Ana Fernández. 

"Estivemos tomando máis medidas de precaución. Isto non adoita pasar aquí, e collemos un pouquiño de medo. Entón estamos máis alerta, coas cámaras e con vixilancia", agrega Pilar Corgos. 

Así e todo, dende a asociación de comerciantes do centro da vila consideran que o acontecido foi un feito illado.