Retíranse os tractores que rodeaban a muralla de Lugo tras a votación da Eurocámara contra o Mercosur
Retíranse os tractores que rodeaban a muralla de Lugo tras a votación da Eurocámara contra o Mercosur
A pasada noite desconvocábase a tractorada en Lugo logo da denuncia do acordo UE-Mercosur tras coñecer o resultado da votación en Estrasburgo, onde por unha estreita marxe aprobouse remitir o texto do tratado comercial ao Tribunal de Xustiza Europeo
A pesar de que non é o final das protestas, ábrese un período de reflexión para determinar que “medidas levar a cabo”
Manifestantes na muralla de Lugo antes da retirada, onte, mércores 21 de xaneiro
Os gandeiros que mantiñan activa a protesta contra o acordo comercial entre a Unión Europea e Mercosur tomaron a decisión de retirar a pasada noite as decenas de tractores que ocupaban un dos carrís da rolda da Muralla, despois de coñecer o resultado da votación do Parlamento Europeo.
A decisión do Parlamento Europeo, que os gandeiros concentrados en Lugo esperaban con expectación, chegou ao mediodía, cando se coñeceu o resultado da votación en Estrasburgo, onde por unha estreita marxe aprobouse remitir o texto do tratado comercial ao Tribunal de Xustiza Europeo, o cal atrasará a ratificación do acordo ata que haxa un veredicto sobre se é ou non compatible co dereito comunitario.
Ás dez da noite, os gandeiros volveron reunirse ante a sede da Delegación Territorial da Xunta de Galicia en Lugo, na rolda da Muralla, un punto que se converteu nos últimos dez días no epicentro das protestas contra un tratado comercial que as organizacións convocadoras das mobilizacións, Agromuralla e Gandeiros Galegos da Suprema, cualificaron como “unha puñalada ao rural” galego.
Dado que o veredicto do Tribunal de Xustiza Europeo pode tardar entre 18 e 24 meses, e tendo en conta de que a tramitación do tratado queda en suspenso ata que se produza ese pronunciamento, o presidente de Gandeiros Galegos da Suprema, Santiago Rego, precisou que o sector primario ten agora máis “marxe de manobra” para tomar decisións.
Os tractores comezaron a abandonar a cidade pola noite, pero desde as organizacións convocantes avisaron que este punto de inflexión non é o final das protestas, tendo en conta de que a votación no Parlamento Europeo tampouco pon fin ao acordo asinado a pasada fin de semana en Paraguai.
De feito, a partir deste intre, precisou, ábrese un período de reflexión para determinar que “medidas levar a cabo” para seguir expresando o seu rexeitamento ao acordo, unha resistencia que, a partir de agora podería manifestarse “en días puntuais” e con “accións concretas”.
.png)
