Restablécese o tren na liña do Miño e só falta o Ourense-Santiago convencional

O servizo ferroviario da rede convencional entre Vigo-Redondela e Tui quedou restablecido entre as 13 e as 14 horas deste martes, informaron a EFE fontes do Adif, o administrador de infraestruturas.

Así mesmo, no mesmo intervalo temporal, tamén se restableceu o tráfico entre Ferrol e Ribadeo e a conexión con Asturias, da rede de vía estreita.

Ambas as liñas estaban cortadas desde onte luns tras verse afectadas polas choivas da borrasca Joseph.

Ademais, o servizo ferroviario da rede convencional entre Ourense e Vigo quedou restablecido e só queda suspendido o que une Santiago e Ourense pola rede convencional, non pola de alta velocidade, segundo informan fontes do Adif.

Ademais das incidencias nas estradas, durante este martes realízanse traballos de recoñecemento da infraestrutura ferroviaria tras os cortes de onte luns.

Deste xeito mantéñense plans alternativos de transporte entre Ourense e Santiago en trens de media distancia.

Os servizos do Eixo Atlántico de ancho convencional préstase con orixe/destino alternativo Vigo Urzáiz-A Coruña.