Putin non encabeza a delegación negociadora rusa en Istambul para o encontro con Ucraína
O equipo negociador ruso na cidade turca estará presidido polo asesor presidencial Vladímir Medinski, o mesmo que encabezou as negociacións en 2022
Zelenski di que, segundo a quen envíe Moscova ás negociacións decidiranse próximos pasos
O presidente ruso, Vladimir Putin, durante unha rolda de prensa/Alexander Nemenov/Reuters
O presidente de Rusia, Vladímir Putin, non encabezará a delegación negociadora rusa nas negociacións con Ucraína que terán lugar este xoves en Istambul.
O equipo negociador ruso na cidade turca estará presidido polo asesor presidencial Vladímir Medinski, o mesmo que encabezou as negociacións con Kiev en Istambul en 2022.
Ademais, a delegación rusa estará formada por un viceministro de Exteriores, un viceministro de Defensa e un alto cargo do Estado Maior do Exército ruso.
Rusia non revelou ata o último momento os nomes dos integrantes do seu grupo negociador e algúns medios chegaron a escribir que este podería estar composto polo asesor para Asuntos Internacionais do Kremlin, Yuri Ushakov, e o ministro de Exteriores, Serguéi Lavrov.
Polo momento, descoñécese se o mandatario ruso optará por desprazarse a Istambul a pesar de non encabezar a delegación do seu país nas conversacións.
"A delegación rusa esperará á delegación ucraína en Istambul", dixo Dmitri Peskov, portavoz presidencial.
O presidente de Ucraína, Volodímir Zelenski, afirmou que con base en quen envíe finalmente Moscova ás negociacións, o seu Goberno determinará os próximos pasos a seguir e asegurou que Kiev está disposto a participar en calquera formato de negociación.
