Rusia convértese no primeiro país en recoñecer os talibáns como Goberno lexítimo
Moscova destacou que a decisión axudará a fortalecer a cooperación en áreas como a seguridade e a loita antiterrorista
Soldados talibáns celebran o segundo aniversario da caída de Cabul (Ali Khara/Reuters)
Rusia converteuse no primeiro país do mundo en recoñecer aos talibáns como o Goberno lexítimo de Afganistán, despois de retiralos en abril da lista de organizacións terroristas.
A decisión foi tomada polo presidente ruso, Vladimir Putin, ante a proposta do ministro de Exteriores, Serguéi Lavrov.
Así o explicou Dmitri Zhirnov, embaixador ruso en Kabul, á televisión pública, tras dicir que o recoñecemento do Emirato Islámico de Afganistán, o nome elixido polos talibáns, "demostra o desexo de Rusia de establecer unha cooperación plena con Afganistán".
O embaixador destacou a tradicional amizade de Rusia co pobo afgán, país centroasiático invadido pola Unión Soviética entre 1979 e 1989, guerra que deixou uns 15.000 soldados soviéticos mortos.
Os talibáns izaron a súa bandeira, branca co credo islámico escrito no centro, no balcón da súa embaixada na capital rusa por primeira vez desde a súa chegada ao poder en 2021.
O novo embaixador afgán, Mawlawi Gul Hassan, chegou a Moscova onde presentou as súas cartas credenciais ante o Ministerio de Exteriores.
Agora, os talibáns xestionan misións diplomáticas en polo menos 14 países, entre eles Turquía, China e Paquistán, pero Rusia é o primeiro país en recoñecelos.
Putin promulgou en decembro de 2024 unha lei que permitía retirar aos talibáns e a outros grupos da lista de organizacións terroristas, a condición de que renunciasen a apoiar, xustificar e facer propaganda do terrorismo.
Os talibán foron incluídos na lista en 2003 co argumento de que empregaban métodos terroristas e mantiñan vínculos con formacións armadas ilegais en Chechenia, onde Putin lanzara a Segunda Guerra de Chechenia en 1999.
Rusia comezou a tender pontes cos talibáns anos antes de que recuperasen o poder en Cabul en 2021 tras a retirada militar estadounidense e, de feito, recibiunos en Moscova en varias ocasións.
O xiro produciuse cando os talibáns declararon a guerra ao Estado Islámico, tras o que algúns dos seus representantes foron convidados en 2018 a visitar a capital rusa.
Nos últimos meses o goberno ruso mostrouse disposto a cooperar cos talibáns tanto na loita contra o terrorismo como no terreo económico e comercial.
