Prisión provisional para o home acusado de acoitelar a exmuller diante dos fillos en Ourense
A xuíza impúxolle ademais unha orde de afastamento e retiroulle a patria potestade dos nenos
Deteñen un home por acoitelar a exmuller en Ourense, que permanece hospitalizada
O home acusado de acoitelar a exmuller en presenza dos fillos o pasado mércores en Ourense pasou a disposición do Xulgado de Violencia sobre a Muller.
A maxistrada acordou o seu ingreso en prisión provisional comunicada e sen fianza, investigado por un delito de asasinato en grao de tentativa.
Acordou, ademais, orde de protección para a vítima e os seus dous fillos menores, o que lle impide "aproximarse a menos de 500 m. deles, do seu domicilio, lugares de traballo ou estudos ou calquera outro por eles frecuentado, así como comunicarse con eles por calquera medio".
A xuíza entende que a medida de prisión provisional "preséntase como medida indispensable, idónea e proporcional para garantir a integridade e seguridade da prexudicada durante a tramitación da causa", ademais de para evitar o risco de fuga.
Suspendeu tamén a patria potestade do investigado sobre os menores, "atribuír á nai o exercicio exclusivo da patria potestade e a garda e custodia de tales menores, non establecer visitas dos menores co seu pai e establecer unha pensión alimenticia mensual a favor destes".
