Preocupación en Viveiro catro anos despois da riada de Xunqueira
Os veciños denuncian o risco dunha nova enchente no barrio onde morrera unha muller
Demandan medidas urxentes das administracións para evitar unha nova traxedia
En novembro de 2018 morría en Viveiro unha muller de 83 anos como consecuencia do desbordamento do regato Fontecova. Catro anos despois, a abundancia de chuvias preocupa os veciños do mesmo barrio de Xunqueira, que temen que se produza unha nova riada.
Os residentes non só sinalan a falta de limpeza do regato como a orixe do problema, senón tamén as pontes caídas río arriba, onde se poden formar presas.
"Ampliar a canle, limpar e vixiar máis a corta de madeira de eucalipto, que é o que hai aí arriba. A folla do eucalipto é o que entupe e orixina isto. O outro día chegou a uns 20 centímetros da rúa que se inundou da outra vez", di Alfonso Otero Regal, secretario da asociación de veciños Valdeflores de Xunqueira.
Pola súa parte, dende o Concello de Viveiro afirman ter listo un proxecto de mellora para o regato Fontecova. Doutra banda, os veciños de Xunqueira reclaman tamén a rehabilitación das casas en ruínas, que corren o risco de derrubarse en calquera momento.
