Preocupación en Meaño pola vaga de vehículos queimados na rúa nos últimos meses

Veciños de Meaño denuncian o elevado número de vehículos que arderon nas súas rúas nos últimos tempos. Os corpos e forzas de seguridade sospeitan da intencionalidade da maioría deles e investigan o sucedido para dar cos responsables.

Dous vehículos arderon nesta rúa dos Colexios baixo o portal do número 1 do núcleo de Dena, no concello pontevedrés de Meaño. Foi de madrugada, hai menos dun mes.

A dona dun deles que está segura de que alguén lle prendeu lume confirma que foi a propia Garda Civil a que a avisou do que estaba acontecendo. O outro coche que se viu afectado pertencía a un home que vive en Madrid e que estaba visitando a súa nai. 

A pasada semana na zona de Altamira ardeu outro vehículo en circunstancias similares. Efectivos de emerxencias de Sanxenxo acudiron para extinguilo.

Nos meses de maio e agosto tamén na zona da praza do Corazón outros coches arderon de madrugada. Os veciños están fartos destes feitos e reclaman máis vixilancia policial. 

Pensan que ao mellor non todos pero a maioría destes incendios son provocados. Dende o Concello de Sanxenxo aseguran que estes sucesos están baixo investigación e que non poden dar máis información ao respecto. Meaño só conta cun policía local e os postos da Garda Civil más próximos son os do Grove e Sanxenxo.

A veciñanza mentres tanto agarda preocupada e desexosa de que pronto as investigacións cheguen a bo termo e dean co responsable ou responsables destes incidentes.