Preocupa a evolución en Vigo e Ourense e non se descartan novas medidas
A Xunta activará novas restricións se a presión hospitaliaria continúa crecendo
O subcomité clínico analizará o impacto da ponte na incidencia
O conselleiro de Sanidade, Julio García Comesaña, adiantou este martes en Vigo que se a situación dos hospitais continúa empeorando por mor do incremento de ingresos por covid virán as restricións.
"Se a situación hospitalaria nos leva a ter que tomar algunha medida, haberá que tomala, por suposto", dixo Comesaña, quen manifestou que iso se saberá o venres, tras a reunión do subcomité.
Segundo o conselleiro, actualmente os datos "son razoables", aínda que preocupa a situación das áreas sanitarias de Vigo e Ourense, tanto polo numero de casos como pola ocupación hospitalaria.
En todo caso, segundo Comesaña, os datos da pandemia axústanse agora mesmo ás previsións de Sanidade, segundo o modelo preditivo que leva utilizando Sanidade desde o principio da pandemia.
"Pero hai un elemento que temos que ver como responde, que é a interacción derivada destas pontes", engadiu o conselleiro, quen explicou que eses modelos preditivos utilizáronse ata o de agora en contextos de restricións ou de vixencia de medidas, e non neste contexto de alta mobilidade nas pontes, o cal introduce unha variable descoñecida.
