O festival de cinema de Ourense estrea unha sinfonía que será a súa banda sonora
O tema propio do OUFF é unha canción composta polo músico galego José Manuel Cancela, gañador de cinco premios Emmy
Foi interpretada pola Xove Orquestra Ourensanía, conducida polo seu autor, no Auditorio Municipal de Ourense
O OUFF, o Ourense Film Festival, acolleu este domingo un concerto tributo ao compositor Hans Zimmer a cargo da Xove Orquestra Ourensanía, no que o público puido gozar en directo dalgunhas das bandas sonoras máis icónicas das últimas décadas.
Ademais, por primeira vez o festival de cinema de Ourense conta cunha banda sonora propia. Un tema composto por José Manuel Cancela, o compositor galego gañador de cinco premios Emmy e do premio Chano Piñeiro do OUFF deste ano.
Unha sinfonía de estrea que foi interpretada tamén pola Xove Orquestra Ourensanía, conducida polo seu autor, no Auditorio de Ourense. E outra curiosidade, John Axiom creou unha versión remix deste tema que se fixo en exclusiva para o festival.
A música está a ser un elemento importante da 30.ª edición do OUFF, que se celebrará ata o 5 de outubro, coorganizado pola Deputación de Ourense e a Asociación Luarada.
