Pontón: "O voto do BNG hai que gañalo e, para iso, hai que cumprir con Galicia"

A voceira nacional do BNG, Ana Pontón, reivindicou este sábado a formación nacionalista como cabeza do cambio en Galicia nas eleccións do próximo ano e advertiulle ao PSOE e a Pedro Sánchez que o voto do BNG "hai que gañalo".

Na súa intervención no Consello Nacional do BNG, analizou as tres cuestiones "relevantes" que marcarán o contexto político nas vindeiras semanas e meses: a formación de Goberno, a crise de prezos e o cambio político que aspira a liderar tras as eleccións galegas.

Segundo dixo, a súa formación está centrada en defender os intereses de Galicia "ante un goberno do PP" na Xunta "de brazos caídos, desnortado e supeditado a Madrid".

Criticou que estea situado "no lado equivocado da historia", como demostra a súa negativa a apoiar o uso do galego no Congreso e "negando a realidade dun Estado plurilingüe, pluricultural e plurinacional".

"Comprometerse e cumprir"

Sobre a investidura, Pontón reiterou que o BNG contribuirá a rexeitar un goberno do PP con Vox pero advertiulle a Pedro Sánchez que se quere o seu apoio terá que "comprometerse e cumprir" coa axenda galega que expoñen os nacionalistas.

Ademais, continuou, o BNG usará a súa influencia "antes e despois da investidura", xa que cada votación vai estar "moi disputada" e será "unha oportunidade" para facer valer o voto dos nacionalistas, polo que avisou: "Que ninguén se chame a engano".

Fondo de rescate hipotecario

Ante a crise de prezos na que a Xunta e o seu presidente "nin están nin se agardan", o BNG levará ao Parlamento a creación dun fondo de rescate hipotecario sufragado nun 75 % pola banca, anunciou Pontón.

Esta medida supoñería na práctica, segundo o BNG, fixar un tope nos intereses para axudar ás persoas con ingresos inferiores ao salario medio estatal, estimado en 26.832 euros brutos ao ano.

Pontón amosouse convencida de que comezou "a conta atrás para o cambio" en Galicia e demandou un novo financiamento para que Galicia teña "o que lle corresponde".

Con este obxectivo propuxo "desbloquear" a comisión parlamentaria de financiamento, "vetada polo PP", e traballar nunha proposta ambiciosa de país para ter "a chave do noso de diñeiro".