Pontevedra e Celta B empatan un partido que non deixa conforme a ningún
Pontevedra e Celta B empatan un partido que non deixa conforme a ningún
O Celta B fixo merecementos para gañar o partido
Malia o empate, o Pontevedra non dá escalado posicións
En Pasarón, o Celta B manexou a primeira parte e tivo opcións para chegar ao descanso cun resultado cómodo ante un Pontevedra desdebuxado.
Os celestes encontraron facilidades nas transicións co dinamismo de Iker e Hugo Álvarez. E souberon aproveitar tamén a falta de claridade local para roubar e levar perigo. Mais unha e outra vez o Celta topou co mesmo obstáculo, con Álvaro Cortés, o mellor dos granates neste primeiro tempo. A soberbia actuación do porteiro deulle vida ao Pontevedra.
Á volta, os granates trataron de recompoñerse coa entrada de Rubio, pero o partido seguiu no mesmo guión. Nun novo roubo de balón, agora de Medrano, Raúl Blanco aproveitaba para poñer o Celta por diante no marcador. Minuto 52. Conta coa xeira do curmán de Iago Aspas; leva tres encontros seguidos marcando.
No que quedaba, o Pontevedra tratou de ir arriba, pero nunca encontrou claridade. O que si encontrou foi un erro maiúsculo de Javi Domínguez a dous minutos da conclusión que lle deu para o empate. Rouboulla Brais e o propio Brais foi quen lla deixou mansiña para empuxar a Martín Diz. Gol de Martín Diz e empate final en Pasarón. O Pontevedra rescatou un punto, o Celta marchou coa sensación de que tirou con dous.
