Desestiman indemnizar unha muller pola caída nunha beirarrúa da Coruña tras tropezar cunha lastra

A caída que sufriu unha veciña de idade avanzada e da zona de Catro Camiños aconteceu a plena luz do día no cruzamento das rúas Pose e Alcalde Marchesi, en marzo de hai cinco anos, cando a zona aínda non era peonil. Pero no barrio aínda lembran o caso.

"Foi por unha baldosa que estaba desnivelada e a señora caeu".

Por mor da caída sufriu danos importantes que a obrigaron a permanecer hospitalizada case tres meses, porque lle tiveron que poñer unha prótese, e estivo arredor de medio ano sen poder realizar a súa vida con total normalidade. Ela entendía que a beirarrúa na que tivo o accidente estaba en malas condicións, polo que decidiu poñer unha reclamación perante o Concello, como responsable, e reclamáballe algo máis de 117.000 euros. 

"Terán que indemnizar. E non é só esa beirarrúa, hai moitas así". "Non é normal que non a indemnicen".

Pois desde o consistorio negaron a súa responsabilidade, contestando que a lastra á que facía mención a vítima estaba nunha zona ancha, no bordo da beirarrúa, e que se camiñase con atención non caería.

"Vaia. Pois eu, a pleno día, caín. Se  amañaran o que teñen que amañar". "Atento tamén vou eu, pero un pé dóbrao calquera".

A muller non parou aí a súa loita e presentou unha demanda no Xulgado do Contencioso-Administrativo número 1 da Coruña, que a rexeitou, ao entender que, "malia que a caída se produciu polo desnivel da lastra, que era visible e estaba no bordo da beirarrúa, a demandante dispuña de espazo suficiente para sortear esa irregularidade".

E engade que non pode entenderse suficientemente acreditada a responsabilidade da Administración nas lesións sufridas. Con esta sentenza, a vítima presentou recurso perante o TSXG, que tamén o desestimou.