Unha asociación de veciños bate co párroco de Coiro quen non cedeu o adro dunha capela para unha festa

Polémica nunha parroquia de Cangas entre a asociación de veciños e o párroco, que se negou a ceder o adro dunha capela para facer a Festa da Xuventude. Porén, a celebración mudou de lugar e foi un éxito. Tres días tivo a asociación de veciños de Santo Domingo da Pedreira para reorganizar a cita festiva. Foi contra o reloxo, pero saíu adiante. Onda o adro da capela, fíxose nun aparcadoiro cedido polo concello. 

A nova directiva foi renovada o pasado mes de decembro nas primeiras eleccións que celebraban en 30 anos. O Presidente da Asociación de Veciños Santo Domingo da Pedreira conta as dificultades polas que pasaron ao atoparen que, cando estaban organizando todo, os antigos directivos organizaranse nunha comisión de festas. O cura, na homilía da misa anterior a festa, anunciou que non os deixaba usar o adro. 

O párroco réstalle importancia á polémica. Fóra de cámara, Benito de la Iglesia di que a nova directiva é xente de fóra, non son fregueses, e non teñen nada que ver coa capela. 

Así que Os Martelos non puideron tocar no palco, pero si facer un pasarrúas.  Dende unha posición conciliadora, a Asociación de Veciños confía en que se poidan superar as diferenzas e as festas volvan ser obxecto de unidade e non de discordia.