Piden prisión para unha luguesa por quedarse con 97.000 euros da herdanza do seu fillo
A nai do menor, que tiña 8 anos no momento dos feitos, asumiu a administración dos bens ao morrer o pai sen testamento
Tiña o cativo "nunha casa con humidade, ratas, sucidade, e non se atendía á súa alimentación diaria"
A muller, que mesmo usou os cartos para unha cirurxía estética en Turquía, enfróntase a tres anos e medio de cárcere
Imaxe de arquivo da Audiencia Provincial de Lugo (TVG)
A Audiencia Provincial de Lugo suspendeu este martes o xuízo contra unha nai que está acusada de gastarse todo o diñeiro que herdou o seu fillo, menor de idade, ao falecer o pai sen testamento. A suspensión foi motivada polo acordo de todas as partes de devolver o caso ao xulgado do Penal, onde está pendente de resolución xudicial.
A muller enfróntase a tres anos e medio de cárcere polos delitos de administración desleal e de abandono da familia. E ademais da Fiscalía, presentaron denuncia particular os familiares do falecido, quen reclama a devolución do diñeiro, que ascende a 97.274 euros.
Os feitos remóntanse a 2019, cando a nai do menor, de 8 anos de idade, asumiu a administración dos bens ao morrer o pai sen testamento. Esta está acusada de desatender as necesidades básicas do neno tras o seu traslado desde Vilalba a Ribadeo, onde vivía "nunha casa con humidade, ratas, sucidade e non se atendía á súa alimentación diaria".
Finalmente, o equipo técnico do Menor da Xunta fíxose cargo do neno ao ser declarado en situación de desamparo con carácter de urxencia e outorgou a custodia do mesmo á avoa tres anos despois, en 2022.
A muller está acusada de, durante ese tempo, utilizar o diñeiro da conta, que ascendía á cantidade que se lle reclama, para diversos pagos e transferencias bancarias.
Usou os cartos para unha cirurxía estética en Turquía
Segundo as acusacións particulares, a cargo do propio menor, a súa avoa e o seu tío, parte dese diñeiro utilizouse, entre outras cuestións, para unha operación de cirurxía estética en Turquía.
En total, na conta quedaron 131 euros, aínda que se recoñece que a muller padecía no momento dos feitos un trastorno ansioso-depresivo que non afectaba as súas facultades; as reclamacións seguen vivas. Pola súa banda, a defensa fala de inexactitudes no discurso da acusación e pide a absolución.
Finalmente, por unha cuestión técnica, o xuízo quedou suspendido, atendendo a que o Penal é o órgano indicado para ofrecer unha sentenza sobre o mesmo.
