Piden 71 anos de prisión para un home acusado de violar tres mulleres ás que captou con anuncios de traballo nun club de alterne

O home que senta desde hoxe no banco dos acusados da Sección Segunda da Audiencia Provincial da Coruña está imputado por seis delitos de violación agravada a tres mulleres, unha delas menor no momento dos feitos. Segundo o escrito de acusación da fiscalía, os feitos sucederon entre marzo e abril de 2023. O acusado contactaría coas vítimas a través de anuncios en que ofrecia traballo de limpeza ou camareiras para un club de alterne que ia reabrir en Ordes.

Cando quedaba con elas, convencíaas para tomar unha copa e introduciulles supostamente na bebida unha substancia que anulou a súa consciencia, e logo abusou delas. A algunha supostamente induciuna a exercer a prostitución.

Dúas das vítimas estaban citadas hoxe e a terceira está fóra do país e foi citada ao seu regreso o 8 de xaneiro. Unha cuestión que o avogado do acusado considera que vulnera o dereito de defensa e polo que pedia a suspensión.

O tribunal rexeitou o recurso e o xuízo comezou coa declaración a porta pechada e por videoconferencia das dúas vítimas que estaban citadas. A Asociación S.O.S. Racismo exerce a acusación popular. Piden máis de 100 anos de prisión ao incluír, ademais das agresións sexuais, os delitos de trata de seres humanos con fins sexuais, detención ilegal e coaccións. A defensa solicita a libre absolución.

O xuízo continuará mañá. O acusado solicitou declarar de último e farao o 8 de xaneiro na derradeira sesión do xuízo.