Pezeshkian nega que os mísiles interceptados en Turquía fosen lanzados por Irán
.png)
Restos do proxectil que caeron na provincia turca de Gaziantep (Reuters)
O presidente de Irán, Masud Pezeshkian, negou nunha conversación co seu homólogo turco, Recep Tayyip Erdogan, que os dous mísiles balísticos interceptados nos últimos días fosen lanzados por Irán, asegura este martes o Goberno turco.
Erdogan falou na noite deste luns con Pezeshkian para insistirlle en que Turquía non está implicada nos enfrontamentos e que vulnerar o seu espazo aéreo, sexa pola causa que sexa, non pode escusarse.
O mércores e o luns pasados, sistemas de defensa antiaérea da OTAN interceptaron mísiles balísticos lanzados, segundo o Ministerio de Defensa turco, desde Irán.
O primeiro foi interceptado a uns 65 quilómetros ao leste da base aérea de Incirlik na provincia turca de Adana, utilizada por unidades da OTAN, e o segundo, aparentemente cunha traxectoria similar, a uns 150 quilómetros, na provincia de Gaziantep.
Pezeshkian asegurou a Erdogan que os mísiles que penetraron no espazo aéreo turco non proceden de Irán e prometeulle abrir unha investigación, sinala o comunicado da Presidencia turca, publicado na rede X.
Xa o xoves pasado, o Estado Maior das Forzas Armadas de Irán negou lanzar tanto o mísil interceptado en Turquía o día anterior, como os drons que impactaron nun aeroporto de Acerbaixán.
Este luns, medios turcos informaron de que o portavoz do Ministerio de Exteriores iraniano, Ismael Bagaei, rexeitou nunha rolda de prensa todo ataque contra Turquía, Acerbaixán e Chipre, por ser países non implicados.
Erdogan expresou a Pezeshkian na súa conversación telefónica na noite deste luns que non lle parecen aceptables nin as "ofensivas ilegais contra Irán", nin tampouco os contraataques iranianos contra "países irmáns na rexión", en referencia aos Estados árabes do Golfo.
Tamén lle deu o pésame pola perda de vidas, especialmente polas nenas mortas no ataque a unha escola de Minab, así como polo falecemento do líder supremo Alí Khamenei, e trasladoulle a súa felicitación pola elección no cargo do seu fillo, Mojtaba Khamenei.
