Os Emiratos suspenden relacións comerciais con Irán polo lanzamento de mísiles que Teherán nega

Os Emiratos Árabes Unidos (EAU) anunciaron este martes a suspensión, ata novo aviso, de todas as súas relacións comerciais, intercambios mercantís e transaccións financeiras con Irán, despois de que as autoridades emiratíes detectasen o lanzamento de dous mísiles balísticos iranianos cara ao seu territorio.

Porén, Teherán tachou de "infundadas" as acusacións emiratís que cualificou como "contrarias ao principio de boa veciñanza".

Mísiles que "tiñan como obxectivo o tráfico marítimo"

O anuncio dos EAU produciuse despois de que o seu Ministerio de Defensa informara de que os sistemas de defensa aérea detectaran "dous mísiles balísticos lanzados desde Irán" contra o país.

O primeiro dos proxectís caería fóra das augas territoriais emiratíes, mentres que o segundo impactaría dentro desas augas.

As autoridades agregaron nunha concisa nota posterior que, tras as avaliacións realizadas, determinaron que os mísiles "tiñan como obxectivo o tráfico marítimo", sen achegar máis detalles.

Así, o Departamento de Comunicacións Estratéxicas do Ministerio de Asuntos Exteriores, emitía un comunicado no que sinalaba que "á luz das tensións rexionais que socavan a paz e a seguridade rexionais e internacionais, suspendéronse ata novo aviso todos os intercambios comerciais e as transaccións financeiras con Irán".

No entanto, reafirmaban "o compromiso dos Emiratos co diálogo, a cooperación e a integración rexional como medios esenciais para promover a paz, a estabilidade e a prosperidade na rexión".

Reacción de Teherán

Ese comunicado foi respostado polo Ministerio de Asuntos Exteriores de Irán, que negou esas acusacións, que cren que socavan os esforzos por xerar confianza na rexión.

O voceiro da diplomacia iraniana pedía que calquera valoración da situación teña en conta o que denominou "accións maliciosas" que cre que seguen exercendo os Estados Unidos e Israel contra a paz rexional.

Nas últimas semanas, os Emiratos denunciaran ataques iranianos contra buques da súa petroleira estatal que transitaban a través do estreito de Ormuz, aínda que non informaron de ningunha acción contra o seu territorio, que tamén se viu ameazado polas milicias proiranís de Iraq.

Isto prodúcese despois de que o presidente dos Estados Unidos, Donald Trump, asegurara este martes que non hai conversacións "en curso nin programadas" con Irán, un día despois de que terminase o prazo de 60 días acordado no memorando de entendemento asinado entre Teherán e Washington o 17 de xuño para lograr a paz.

A guerra con Irán, que empezou o pasado 28 de febreiro tras a ofensiva dos EUA e Israel e que está a piques de facer seis meses, converteuse nun conflito enquistado sen que, polo momento, as negociacións abertas en varias ocasións conseguisen avances significativos ou un achegamento nas posturas das partes.