Pedro Sanchez xa está na China para iniciar unha viaxe oficial na que se reunirá con Xi Jinping
O goberno busca que a China poida desempeñar un papel relevante na reducción das tensións nos conflitos internacionais activos e tamén reforzar a cooperación económica
Pedro Sánchez e a súa muller, Begoña Gómez, á súa chegada a Pequín (EFE)
O presidente do Goberno, Pedro Sánchez xa está na China para manter un novo encontro con Xi Jinping. Esta é a cuarta visita do presidente do goberno ao país.
Sánchez chegou a Pequín acompañado da súa muller, Begoña Gómez, a bordo dun avión da forza area española. A axenda oficial comezará o luns.
O goberno busca que a China poida desempeñar un papel relevante na reducción das tensións nos conflitos internacionais activos. Ademais pretenden reforzar a cooperación económica e acceder a materiais fundamentais para o desenvolvemento da industria tecnolóxica en España.
A iso súmase fortalecer a relación bilateral nos ámbitos da educación, a cultura e a innovación. Para conseguir todo iso, a axenda de Sánchez inclúe unha visita á universidade de Tsinghua, unha das máis prestixiosas da China, onde terá unha intervención e reunirase con expertos en relacións internacionais, para trasladarse despois á Academia Chinesa de Ciencias, que lle concederá un título honorífico.
Visitará ademais a sede da tecnolóxica Xiaomi, punteira en software para móbiles, reunirase con investidores chineses e con empresarios españois con intereses no país, e terá outros encontros con representantes de empresas innovadoras, e cos responsables da Cámara de Comercio UE-China.
Esa relación entre os Vinte e sete e o país asiático é considerada de gran relevancia para o Goberno, que ante esta viaxe, coordinou mensaxes coas principais autoridades comunitarias.
