Sánchez cre que haberá goberno progresista e pídelle ao PP calma e respecto
O PP considera que o máis difícil é a gobernabilidade con Junts, ERC ou Bildu
Sumar insiste en que non lle dará ao PSOE un cheque en branco
En España, o presidente do Goberno en funcións segue confiando en que haberá acordo para a súa investidura e pídelle ao PP calma, sensatez e respecto.
O expresidente da Generalitat, Carles Puigdemont, insistiu este sábado, a través das redes sociais, que España ten un problema grave porque debe elixir entre repetir eleccións ou pactar con Junts, que non renunciará á vía unilateral.
Aínda así, a voceira de Sumar no Congreso, Marta Lois, está convencida de que vai haber un goberno progresista e reivindica o papel da formación nas negociacións para a investidura.
"Queremos unha axenda social á altura do país que temos, un país que precisa que Sumar sexa pioneira para mover todos eses marcos porque o partido socialista quere unha lexislatura 'ao ralentí' e Sumar non é un cheque en branco".
O Partido Popular cre que o máis complicado das negociacións non é a investidura.
"Alguén pensa que Junts ten algún interese na gobernabilidade de España? Alguén cre que Bildu ou ERC teñen algún interese na gobernabilidade de España? Resulta que a gobernabilidade do país se vai sustentar nestas formacións que teñen intereses particulares, non digo ilexítimos pero si particulares, e entón quen fala dos problemas de España?", pregúntase Borja Sémper.
O presidente do Goberno en funcións admite que as negociacións son complicadas, pero cre que haberá acordo e criticou o PP por contribuír a aumentar a crispación.
"Pido calma, sensatez e respecto, imos traballar para que haxa un goberno progresista, que faga políticas progresistas, que aposte pola convivencia sempre dentro do marco da Constitución española".
