O PSOE acusa o PP de politizar a xustiza e denuncia unha "cacería" contra Sánchez

O PSOE, reunido en Sevilla no seu 41 Congreso Federal, empregouse a fondo para defenderse dos casos que enturbaron o conclave que vai arroupar a Pedro Sánchez.

Denunciou que a estratexia de "acoso e derrubamento" da dereita usa "loiadas" e "mentiras" ata chegar a unha "cacería humana" contra o presidente. Son termos que empregou o secretario de Organización, Santos Cerdán, ao presentar este sábado o seu informe de xestión.

Van na liña das utilizadas por outros dirixentes e baróns que coincidiron en rexeitar de plano todas as acusacións vertidas contra os socialistas e o propio Sánchez, presente no plenario.

"Nunca antes houbo en democracia un ataque similar contra un presidente lexítimo", proclamou Cerdán, quen arrincou os aplausos cando salientou que as "mentiras" vertidas polo PP e a dereita contra o PSOE, tamén o son "en sede xudicial".

Ante estas acusacións de corrupción -como as que el mesmo recibiu do presunto comisionista implicado no caso Koldo, o empresario Víctor De Aldama- chamou á familia socialista a reaccionar e a facerlles "fronte".

Tamén o dixo a vicesecretaria xeral, María Jesús Montero, para quen a actitude de Sánchez constitúe un exemplo de "fortaleza" do PSOE á hora de loitar contra "os ataques, as mentiras e as inxustizas".

Con parecidos argumentos defendeuse nos corredores do congreso o secretario xeral dos socialistas estremeños, Miguel Ángel Gallardo, da súa imputación na investigación aberta pola contratación de David Sánchez, irmán do presidente do Goberno.

"Non me preocupa nada en absoluto, o que me preocupan son as loiadas, as mentiras e as denuncias falsas", asegurou tras remarcar que as acusacións parten "dunha mentira da ultradereita".

Page pide evitar o vitimismo no PSOE

Só se desmarcou do argumentario o presidente de Castela-A Mancha, Emiliano García-Page, sempre crítico coa dirección do partido, ao recomendar que se evite o papel de "vítima" cando se goberna e botar en falta máis autocrítica da súa formación.

"Viría ben que, nalgún momento, cara a fóra o PSOE puidese dicir que nalgunhas cousas nos podemos equivocar".

Proxecto "sólido e útil" fronte ao "ruído"

O partido chegou ao seu congreso tras unha difícil semana que os seus dirixentes admiten como moi adversa, coa dimisión do líder do PSOE de Madrid, Juan Lobato, como pano de fondo, e por iso esforzáronse en invocar o debate ideolóxico, máis aló do "ruído" externo que lles axexa.

O presidente da Generalitat, Salvador Illa, expresouno con claridade ao chamar á construción dun proxecto "sólido e útil" para España e a reforzar o liderado de Sánchez tras seis anos de "bo goberno" fronte ao "ruído".

Tamén o líder dos socialistas vascos, Eneko Andueza, instou a afastarse dese "ruído" procedente das acusacións de corrupción porque "non contribúe a facer debates sosegados" e asegurou que o PSOE está nun "extraordinario momento" malia a "estratexia dalgúns" de "xudicializar" todo.

Os reproches ao líder do PP, Alberto Núñez Feijóo, foron recorrentes dentro e fóra do plenario, con declaracións como a do ministro de Política Territorial, Ángel Víctor Torres, quen lle afea o ataque continuo a Sánchez ao non admitir a súa "lexitimidade" como xefe do Executivo

Duras críticas tamén contra Carlos Mazón pola súa xestión da catástrofe provocada pola DINA. Os asistentes esixiron a súa dimisión cando a ministra de Ciencia e líder dos socialistas valencianos, Diana Morant, lembrou as vítimas nun acendido discurso.

Aplausos a Chaves e Griñán

Do mesmo xeito, o plenario serviu para reivindicar as figuras dos expresidentes andaluces Manuel Chaves e José Antonio Griñán, logo de que o Tribunal Constitucional anulara as súas condenas polos ERES falsos e foron agasallados cunha ovación dos presentes, postos en pé.

Faltaron, con todo, ao congreso o expresidente Felipe González e o histórico socialista sevillano Alfonso Guerra, distanciados con Sánchez por mor de cuestións clave como a lei de amnistía ou o financiamento singular para Cataluña.

Si estiveron os máximos dirixentes da UXT, Pepe Álvarez, e CC OO, Unai Sordo, que en sintonía coa cúpula socialista instaron a Sánchez a "resistir" ante os ataques e as loiadas da dereita "reaccionaria" e dos "poderosos".

Delegación galega

A delegación dos socialistas galegos está formada por cen integrantes, que levan a Sevilla unha axenda de progreso.

José Ramón Gómez Besteiro dixo que fronte ás propostas en positivo, o PP tenta xudicializar a política. 

Sánchez pecha o conclave

Sánchez, que este sábado xa acudiu ao recinto onde se celebra o congreso federal, non falou, á espera do discurso co que este domingo pechará o conclave, despois da votación da nova Executiva.

Porén, xa adiantou nas redes sociais que "o mellor está por vir" e asegurou que os socialistas asisten a esta cita congresual con "máis ganas, forza e ilusión ca nunca".

"Unha fin de semana de reflexión sobre os grandes retos que temos por diante. O mellor -garantiu- está por vir".

Para iso subliñou que o que ten que facer a súa formación política é seguir avanzando "por responsabilidade, por esperanza, pola esquerda".

Ademais, tivo un recordo para a situación que se segue a vivir na Comunidade Valenciana tras a DINA do 29 de outubro ao asegurar que os socialistas asisten a este congreso de Sevilla "co corazón en Valencia".

Con el corazón en Valencia, hoy inauguramos en Sevilla el #41CongresoPSOE con más ganas, fuerza e ilusión que nunca.

Un fin de semana de reflexión sobre los grandes retos que tenemos por delante.

Lo mejor está por venir. Solo hay que seguir avanzando. Por responsabilidad, por… pic.twitter.com/nWq7FOxZTd

— Pedro Sánchez (@sanchezcastejon) November 30, 2024