Paixón por aprender aos 84 anos

A inquedanza por aprender non sabe de idade. Aos seus 84 anos, Delmira Santos non perde nin unha soa clase. Matriculouse na Universidade a Distancia en Ourense hai seis anos. Este cuadrimestre estuda Bioloxía e Historia da Arte. Ampliar coñecemento e cultura é a súa paixón.

Tivo que deixar de estudar aos 15 anos para traballar e despois tivo que coidar dos seus cinco fillos. Cando se xubilou retomou as súas inquedanzas. Comezou coa pintura e despois coa formación universitaria. A vida, di, dá moita sabedoría, pero sempre se poden aprender cousas novas.