Os sindicatos O'Mega e Simega súmanse á folga estatal por un Estatuto Marco propio para médicos
Piden á Consellería de Sanidade que cumpra cos acordos que levaron a desconvocar a folga de novembro
Protesta de médicos diante do CHUS, en Santiago de Compostela, o pasado mes de decembro (Europa Press)
Os sindicatos médicos O'Mega e Simega súmanse á folga estatal convocada por varias centrais sindicais para este mércores 14 e xoves 15 de xaneiro por un Estatuto Marco propio.
Ademais da retirada do proxecto de estatuto presentado polo Ministerio, ambos os dous sindicatos teñen tamén peticións para a Consellería de Sanidade. Concretamente esixen ao Sergas o desenvolvemento integral do novo modelo de Atención Primaria e que se cumpran os acordos alcanzados o 25 de novembro de 2025 que levaron á desconvocatoria da folga.
Entre eses acordos atopábase a voluntariedade para facer gardas en Atención Primaria de maneira incentivada, incluídas as dos sábados pola mañá; a desaparición paulatina da categoría FEAP, que xa se iniciou; a limitación de axendas a 30 actos; a redución das tarefas burocráticas, e o acceso á especialidade exclusivamente a través da vía MIR.
Así mesmo, reclaman outras medidas, como a aplicación do Acordo de Urxencias Hospitalarias de 2007 no referente á xornada, retribucións e condicións de traballo, e o desenvolvemento do Regulamento para Módulos Compensatorios de Gardas, incluídos menores de 55 anos exentos por razóns de saúde.
As mobilizacións previstas
As centrais sindicais animaron os médicos galegos a sumárense ás concentracións que se celebrarán ás 11:00 horas o mércores e o xoves e a acudiren ás portas dos principais centros hospitalarios e centros de saúde das distintas áreas sanitarias do Sergas.
O mesmo para a manifestación que se celebrará o mércores 14 e partirá da Alameda de Santiago ás 18:00 horas, para acabar na Praza de Praterías.
