Os peregrinos poñen boa cara ao mal tempo na ponte festiva
No inverno descende o número de camiñantes pero hai xente que aproveita estes días para obter a Compostela
Que os peregrinos están feitos dunha pasta especial está claro, porque botarse a andar polos camiños co vento e as chuvieiras destes días non semella moi tentador. E é que as estatísticas rexistran un descenso de camiñantes coincidindo co inverno, pero os que o fan chegan co convencemento intacto.
"Unha experiencia inesquecible, entre compañeiros e amigos desfrutando do camiño. Chove un pouco pero os galegos xa estamos afeitos a todo", comenta unha peregrina de Lalín.
Coa barreira do medio millón de peregrinos superada e cun crecemento do 6% anual de camiñantes, as cifras da ruta seguen superándose cada tempada.
Mesmo o número de galegos que fan o camiño, que só representan un pequeno 5% do total, aínda que a cifra é máis ampla xa que moitos non se rexistran ao final percorrido.
"Moito chinés sobre todo e xaponeses, hai unha manchea. Galegos penso que se contan cos dedos dunha man", sinala outro dos camiñantes.
Con todo, entre os 150 camiñantes diarios que obteñen a Compostela neste tempo, moitos aproveitaron a ponte festiva para cumprir o seu obxectivo.
"Vimos de Navarra, dunha localidade da ribeira. Levamos dous anos facendo o camiño a etapas, aos poucos, pero conseguímolo", conta a peregrina dun grupo procedente da localidade navarra de Murchante.
Ao final sexa no inverno, sexa no verán, a experiencia de chegar á compostelá praza do Obradoiro merece a pena da espera ou de soportar o mal tempo. E se a motivación fraquea, nada como un ano xacobeo para animarse e o vindeiro está a pouco máis de doce meses.
