Os parques eólicos máis antigos teñen 18 meses para presentar un plan de repotenciación
Afectará 20 parques de máis de 25 anos de antigüidade, mentres que outros cinco xa o están facendo de forma voluntaria
A Xunta indica que o plan permitirá a retirada de máis de 800 aeroxeradores, que serán substituídos por uns 120 máis eficientes
Parque eólico
Os propietarios de cinco dos 25 parques eólicos máis antigos de Galicia, os que teñen máis dun cuarto de século de antigüidade, están repotenciando esas instalacións de forma voluntaria e os dos 20 restantes teñen un prazo de 18 meses para presentar o seu proxecto.
A Xunta puxo en marcha un plan de repotenciación dos parques eólicos con máis antigüidade da comunidade, que permitirá a retirada de máis de 800 aeroxeradores da paisaxe galega, que quedan reducidos a unha media de 120, informou o Goberno autonómico nun comunicado.
A conselleira de Economía e Industria, María Jesús Lorenzana, visitou na mañá deste martes en Zas un dos cinco parques eólicos que hai actualmente xa repotenciados.
Os restantes están todos na provincia da Coruña: en Corme, Cabo Vilán, Malpica, e entre Mañón e Ortigueira (Serra da Panda II).
"En Galicia, nos próximos anos, vai aumentar a cantidade de parques eólicos repotenciados de forma significativa", dixo a conselleira en base á Lei de medidas fiscais e administrativas, que establece a obriga de repotenciar aqueles parques eólicos cunha antigüidade de máis de 25 anos.
No caso de Zas, da empresa EDP, coa repotenciación o parque pasou de ter 80 aeroxeradores de 300 KW a 10 de 2.400 KW, e duplicou a produción de enerxía de 52,8 GWh/ano a máis de 100 GWh/ano, equivalente ao consumo eléctrico de 30.000 fogares, sinala o comunicado.
Trátase de aeroxeradores máis eficientes. Coa mesma potencia instalada, 24 MW, conseguen un rendemento que pasa das 2.200 horas de funcionamento -a cifra media dun parque normal- a máis de 4.000.
A espera de coñecer os datos do informe anual de Rede Eléctrica, Galicia é a terceira comunidade autónoma con maior produción eléctrica a partir da forza do vento (9.086 GWh).
Segundo a Xunta, a eólica foi a tecnoloxía renovable que máis GWh achegou durante 2023 ao 'mix enerxético' (combinación das diferentes fontes de enerxía que cobren a subministración eléctrica autonómica), ata o 38,1 %.
