Os países europeos endurecen as restricións de cara á Noitevella

A variante ómicron non dá tregua en Europa e os países con máis casos endurecen as restricións de cara á Noitevella. O aspecto positivo é que caen bruscamente os contaxios en Suráfrica, Dinamarca e Noruega, países que xa alcanzaron o seu pico. Os expertos confían en que a experiencia destes tres países sirva de exemplo para augurar o que sucederá en Europa en canto alcancen o tope de casos.

A sombra da variante ómicron está escurecendo o Nadal en Europa pola súa rápida propagación e os gobernos reaccionan con máis restricións. 

Por exemplo, en Portugal, con 800 casos por cada cen mil habitantes, as medidas son cada vez máis duras. Na hostalería e nos eventos culturais e deportivos piden o certificado de vacinación, aínda que non é necesario para cruzar a fronteira.

Nos hoteis piden tamén un test negativo aínda que os clientes estean vacinados. Os días 30, 31 e 1 será necesario tamén para acceder ao interior dun restaurante. O teletraballo é obrigatorio sempre que sexa posible.

O ocio nocturno segue pechado e os comercios adían as rebaixas ata o 9 de xaneiro e reducen ocupacións.

Tamén Francia anunciou novas medidas. O Goberno aprobou o proxecto de lei para que o pase sanitario se converta na tarxeta de vacinación. A dose de reforzo darase aos tres meses da segunda dose. Imponse o teletraballo polo menos tres días á semana. 

A partir do luns que vén prohíbese o consumo de pé en bares e restaurantes, onde estarán limitadas as ocupacións. Tamén nos concertos se deberá estar sentado. A vacinación será obrigatoria a partir do 15 de xaneiro para acceder a actividades de ocio.

Tamén Alemaña endurece as restricións de cara á Noitevella. A partir de hoxe, non poderá haber reunións de máis de dez persoas vacinadas. As discotecas non abrirán e as competicións deportivas serán a porta pechada. 

Fóra de Europa, en Estados Unidos, cunha media de 200.000 casos diarios, as autoridades sanitarias cambiaron as súas recomendacións: reducen á metade as corentenas para as persoas contaxiadas e asintomáticas, de dez días a cinco. Os contactos estreitos que estean vacinados non precisan autoillarse. 

Nos últimos días, centos de voos foron cancelados no país debido ao aumento dos contaxios entre as tripulacións, polo que as grandes aeroliñas pediran ao Centro de Control de Enfermidades que se reduciran os días de illamento. O principal epidemiólogo do Goberno, Anthony Fauci, asegura que estudan tamén novos requisitos de vacinación nos voos domésticos, que agora non existen. 

O presidente Biden asegurou que o feito ata agora non é suficiente e anunciou tamén máis medios: máis puntos de vacinación, reforzo do persoal sanitario e máis probas de diagnóstico.