Os Países Baixos detectaron a ómicron unha semana antes que Suráfrica

O Instituto de Saúde Pública de Países Baixos localizou a variante ómicron en dúas mostras de test que se recolleron o 19 e o 23 de novembro, unha semana antes da chegada dos dous voos de Suráfrica con 61 pasaxeiros contaxiados con coronavirus, entre eles 14 casos desta nova variante.

“O 29 de novembro resultou que as dúas mostras eran efectivamente da variante ómicron. Aínda non está claro se as persoas afectadas tamén estiveron no sur de África”, explicou o RIVM, que xa contactou cos involucrados nesas probas para iniciar unha investigación sobre as circunstancias en que se infectaron.

O pasado venres, 624 pasaxeiros que voaban en dous voos procedentes de Suráfrica foron sometidos a unha proba de coronavirus no mesmo aeroporto de Schiphol, en Ámsterdam, e do total, 61 deron positivo. As súas mostras tamén foron analizadas e detectouse a presenza de 14 casos da variante ómicron. 

"Durante a investigación de laboratorio atopáronse diferentes tipos de cepas de virus da variante  ómicron. Isto significa que as persoas afectadas probablemente contaxiáronse por separado, dunha fonte diferente e nun lugar diferente", engadiu hoxe o RIVM.