Os médicos volven reclamar na rúa un estatuto propio que recoñeza a súa singularidade

Preto de tres mil médicos, segundo os convocantes, volveron saír á rúa en Madrid para reclamar un estatuto propio que recoñeza a singularidade do seu labor, que inclúa unha clasificación profesional axeitada, que coticen para a xubilación as horas de garda e que se reduza a xornada semanal para a conciliación laboral e persoal, entre outras medidas.

A protesta estivo convocada pola Confederación Española de Sindicatos Médicos (CESM), co apoio do Sindicato Médico Andaluz (SMA).

É xa a terceira manifestación co lema "Por un estatuto propio do médico e o facultativo", que recibiu o respaldo da maioría dos profesionais médicos, representantes do Foro da Profesión Médica, sindicatos, colexios de médicos, sociedades científicas e organizacións de estudantes de Medicina e residentes.

Os sindicatos médicos levan anos esixindo ao Ministerio de Sanidade que elabore un estatuto propio do persoal médico e facultativo distinto do resto de profesionais do Sistema Nacional de Saúde. 

"Queremos un estatuto propio que regule as especiais condicións de formación, responsabilidade e desempeño laboral e que sexa o médico quen negocie as condicións laborais do médico", dixo Lázaro, que indica que a esta terceira manifestación uníronse os estudantes de Medicina.

 "Dáme pena que a unha médica, que agora é ministra, os seus propios compañeiros lle fagan unha folga", engadiu.

Ao finalizar o percorrido, o secretario xeral de CESM, Víctor Pedrera, leu un manifesto que denuncia a deterioración que sofren os médicos e facultativos do Sistema Nacional de Saúde, "unha crise que afecta de maneira profunda á sanidade pública e que está a poñer en risco a súa viabilidade nos termos en que a coñecemos".

E concluíu con demandas concretas como unha regulación xusta da xubilación que permita un retiro voluntario anticipado e parcial sen diminución económica, así como unha xornada de 35 horas na que calquera exceso sexa voluntario, pactado e retribuído de forma específica.

A Confederación Española de Sindicatos Médicos (CESM) e o Sindicato Médico Andaluz (SMA) decidiron manter o seu calendario de protestas, incluíndo as catro xornadas de folga do 9 ao 12 de decembro, ao non lograren avanzar nas súas reivindicacións.