Os médicos poderán receitar piscina, unha andaina ou unha charla sobre alimentación
O obxectivo da Estratexia de Saúde Comunitaria do Sergas é que os centros de saúde teñan un papel máis activo na promoción da saúde
Que os centros de saúde ofrezan non só atención médica e coidados cando nos poñemos malos, senón promoción de hábitos que eviten que contraiamos doenzas, en especial hábitos relacionados co exercicio, a alimentación e o apoio social.
A Estratexia Galega de Saúde Comunitaria, que xa se ensaia en dous concellos da provincia da Coruña, Arteixo e Abegondo, pasa por realizar un mapeo de todos os servizos que hai nunha zona, desde instalación municipais a asociacións de pacientes, como os de alzhéimer ou cancro, entidades deportivas, etc.
Ademais dos habituais consellos individuais en consulta, os centros de saúde ofreceranlles aos pacientes dunha mesma patoloxía charlas en grupo sobre hábitos saudables. Hai tamén unha dimensión comunitaria, que implica a todos os axentes públicos e privados da zona,
"Establecemos relacións cos concellos porque eles teñen abano de actividades moi amplo, con asociacións, entidades sociais, entidades deportivas. Entre todos podemos atender mellor o paciente e o seu círculo cunha atención biopsicosocial, non só médica", explica Sofía López Linares, directora xeral de Planificación e Reforma Sanitaria.
O que busca a estratexia é que os centros de saúde sexan máis permeables coa comunidade a que serven e informen aos pacientes dos recursos que existen na zona, fomenten exercicio e outras actividades de promoción da saúde.
O programa inclúe o desenvolvemento de ferramentas dixitais e aplicacións. A dotación inicial é de 1,4 millóns de euros.
