Os médicos pídenlle ao Goberno que modifique o MIR

O Consello Xeral de Colexios Oficiais de Médicos pídelle ao Ministerio de Sanidade que modifique o sistema de adxudicación de Médicos Internos Residentes para evitar que queden prazas sen cubrir, sobre todo de Medicina Familiar e Comunitaria.

Nun informe que presentaron esta mañá os Colexios Oficiais de Médicos reclaman que en próximas convocatorias se cre unha segunda quenda de elección de prazas MIR, se baixe a nota de corte e se amplíe o cupo de aspirantes extracomunitarios.

O presidente do Consello, Tomás Cobo, engadiu que no caso das prazas de Medicina Familiar e Comunitaria é necesario facer máis atractiva a especialidade, introducila nas Facultades de Medicina, mellorar as condicións laborais nos Centros de Saúde e reducir a precariedade.

O Goberno galego tamén lle pide ao Executivo central que tome medidas para non perder as prazas de mir que quedaron sen cubrir. O vicepresidente segundo Diego Calvo cre que axudaría a paliar a falta de médicos.