Os médicos de Primaria verán limitada a axenda a 30 consultas diarias

A Xunta presentou este mércores ante os sindicatos con representación na mesa sectorial as conclusións dun dos grupos de traballo para a reforma da atención primaria, concretamente o de planificación asistencial. Entre as medidas, como xa se comprometera a administración sanitaria, está a limitación das axendas a 30 actos asistenciais.

Entre outras medidas, propoñen un modelo de axendas "de calidade", con tempos mínimos de consulta. En termos xerais, a idea sería adaptar as axendas dos médicos de atención primaria a 30 actos asistenciais: 20 citas por demanda, cinco actos de receitas e cinco de actividade programada para xestionar polo propio profesional -probas ou cirurxías menores-.

Pola súa parte, a axenda dos pediatras quedaría en 25: 14 ocos para citas por demanda, dous actos para receitas e 60 minutos para o programa de saúde infantil.

A todo isto hai que sumar medidas para aliviar a carga burocrática dos facultativos.

Entre elas, a redución de tarefas administrativas "ineficientes" dos médicos mediante a potenciación das áreas administrativas; a estandarización e optimización de procedementos non propiamente asistenciais; o impulso do traballo en equipo; e a potenciación da nova Unidade técnica de apoio á atención primaria.

Nun comunicado, a Consellería de Sanidade detalla que tamén se porán en marcha modelos de gobernanza, onde se potenciará a figura dos xefes de servizo de atención primaria. Ademais realizarase un seguimento continuo da atención sanitaria prestada, avaliando constantemente a capacidade de resposta dos distintos servizos sanitarios.

O documento completo, avanza o departamento sanitario, presentarase con máis detalle en próximas datas, unha vez se dispoña das conclusións do outro grupo de traballo creado, centrado nos recursos humanos e no modelo retributivo.

De feito, destacan, neste mes de xuño está previsto celebrar outra Mesa Sectorial de Sanidade para presentar as conclusións deste segundo grupo de traballo.

Os sindicatos piden máis concreción

Os sindicatos, pola súa parte, mostráronse críticos coa falta de concreción das medidas expostas. De feito, lamentan que "nin sequera" se lles facilitase un documento para analizar.

Trátase, aseguran, de ideas "xerais" sobre as axendas, xefaturas de servizo, áreas administrativas e traballo multidisciplinar.

As sensacións son "boas", recoñecen, pero teñen dúbidas. Máis alá do desenvolvemento destas medidas, queda por saber como se vai xestionar en canto a recursos humanos -implantación doutras categorías ou máis profesionais para as categorías xa existentes- e retribucións; aspectos que está previsto abordar na seguinte mesa sectorial.

Entre as dúbidas, está como levar á práctica a axenda de sobredemanda -medida pactada tamén tras a desconvocatoria da folga de novembro do ano pasado e que inclúe aqueles pacientes que necesiten asistencia máis alá da limitación das axendas-.

Esta axenda -da que pode facerse cargo o propio médico ou outro compañeiro- debe levar aparellada unha retribución en función do número de pacientes atendidos e, tal e como solicitaron os sindicatos no seu momento, debe estimarse como "sobredemanda" e non como "xornada complementaria".