Os galegos da ACB volven á Liga con senllos partidos na casa

Un mes despois, os xogadores do Río Breogán volverán experimentar a sensación de xogar diante dos seus, a de vivir o ruído enxordecedor do baloncesto. O Pazo acolle un Breogán-Betis no que os visitantes chegan agoniados na loita pola permanencia. Os lucenses aproveitaron a parada para recuperar efectivos. Bamforth e Happ, non así Sergi Quintela. A incógnita será como pode afectar o virus FIBA.

Tamén verá o Obradoiro a todo un Real Madrid, que o ano pasado levara o triunfo de Santiago cunha canastra case sobre a bucina de Abalde. O Sar acolle unha das citas grandes da temporada. Estrea de Will Magney, diante dun Real Madrid con baixas, pero con moitas presenzas.

Tavares, mancado nun nocello na Euroliga, será a última e quizais máis importante ausencia dos madridistas en Santiago. Pagou caro o equipo de Chus Mateo o seu importante triunfo na pista do Villeiurbanne. Vitoria por catro puntos de diferenza, cimentada nun excelente primeiro tempo. Os madridistas xa son colíderes da competición continental.