Os forenses axilizan a identificación das vítimas mortais do choque de trens en Toledo
Levantouse un depósito de emerxencia para poder facer as autopsias a carón do Instituto de Medicina Legal de Toledo
As familias dos desaparecidos facilitan o seu ADN nos puntos habilitados pola Garda Civil
A Unidade Militar de Emerxencias habilitou un depósito de cadáveres de emerxencia a carón do Instituto de Medicina Legal de Toledo, onde os forenses tratan de axilizar a identificación das vítimas.
Emiliano García-Page, presidente de Castela-A Mancha, explicou que "nos traballos da noite apareceron restos humanos parciais. Hai acumulados, ademais dos cadáveres, restos que teñen que ir identificando".
Para facilitar a identificación dos corpos, a Garda Civil pide a colaboración dos familiares. O voceiro da comandancia de Toledo, Pedro Pablo Garrido, fixo un chamamento a "todo familiar que non puidese contactar con quen viaxase no tren para que se achegue entregar unha mostra do seu ADN".
Habilitáronse centros en Madrid, Toledo, Sevilla e Córdoba, a onde acoden as familias dos desaparecidos. Moitos séntense perdidos e reclaman máis información.
Dende o Centro de Integración de Datos alertan de que nalgúns casos lles están a chegar ás familias mensaxes de móbil falsas sobre a posible identificación das vítimas, e lembran que as comunicacións se fan de xeito presencial pola Garda Civil e non por teléfono.
