Os expertos descartan volver ás restricións, pero avogan por extremar as medidas preventivas

O risco de contaxiarse de covid aumenta en Galicia, de momento lixeiramente. 

A Coruña é a segunda provincia, despois de Ourense, en abandonar esa cor verde da nova normalidade. Nas últimas horas superou os 25 puntos de incidencia e pasa a nivel marelo. Ourense está xa en laranxa con 53 puntos.

Son as primeiras consecuencias da repunta, que mantén os expertos moi atentos á situación, aínda que, insisten, hai que dimensionar os datos.

"Alármanos un pouco ver o que está pasando en Europa, pero a situación vacinal neses países non é o mesmo que a de España. A pandemia aquí está baixo control e este incremento lento eu atribúo a gromos", explica Juan Gestal, atedrático de Medicina Preventiva e Saúde Pública.

Hoxe superamos en Galicia os 900 casos activos de covid, en total. Hai agora un ano esa era a cifra DIARIA. Naquel outono de 2020 estabamos perimetrados, co comercio e os bares pechando á media tarde, e os hospitais con taxas altas de ocupación. Agora, moitísimo mellor, non cómpre recuperar restricións horarias nin de mobilidade, pero si -opinan os membros do subcomité clínico- manter ben vixentes as medidas preventivas.

"Este tipo de medidas, temos certa tendencia a relaxadas. Cada vez vemos máis xente sen máscara ou con ela por baixo no nariz e iso é como non levala", engade Pedro Rascado,  xefe da Unidade de Coidados Intensivos do CHUS e membro do subcomité clínico.

"É moi importante usar a máscara en lugares pechados e despois, manter esa especie de burbullas, para relacionarnos con persoas que sabemos que mantén unhas medidas preventivas semellantes ás nosas", di Juan Gestal. 

A medida máis importante, a vacinación. Taxas menores dun 40 % manteñen hoxe en desacougo países como Bulgaria ou Romanía.

Pero as vacinas, -insisten- non son esterilizantes: hai persoas co sistema inmune máis débil, por iso, distancia, hixiene e máscara poden evitar que a curva nos dea un novo susto.