Os expertos advirten de que unha nova onda de covid pode chegar en novembro
A ómicron BQ1, unha sublinaxe da Ba5 máis transmisible, xa circula na península ibérica
Xa se advirte un aumento leve das incidencias nos maiores de 60
A covid segue entre nós. Na familia, traballo, entre os amigos, os casos comezan a multiplicarse ao noso arredor. O mal tempo, que obriga a relacionarse máis en espazos pechados, e a baixada de temperaturas favorecen a transmisión dos virus. Os expertos comezan a falar da posibilidade dunha nova onda. As incidencias, que xa só se miden en maiores de 60, están á alza, de momento con lentitude. Pero a hospitalización por covid segue sendo moi escasa e estable.
"Pode parecerse ao outono pasado, que estabamos baixando, parecía que se acababa a pandemia e despois comezou a subir e pegou un chimpo coas novas liñaxes. Agora volvemos ter novas liñaxes e subliñaxes", explica o catedrático Juan Gestal.
Son as subliñaxes o BQ1 e BQ1.1 que apareceron en verán en Nixeria e que se propagan agora polos Estados Unidos e Europa. Xa se detectou na analítica das augas residuais en Barcelona. Son máis transmisibles que a Ba5 e teñen un maior escape inmune. Isto explicaría que nos puidésemos infectar máis.
"Pero os anticorpos celulares, que todos tempos porque estamos moi ben vacinados, protéxennos contra as formas graves da enfermidade. O escape inmune é en relación aos anticorpos neutralizadores, non os anticorpos celulares", matiza Gestal.
Polo tanto, non se espera unha maior gravidade, pero si unha nova onda de contaxios, quizais en novembro. O máis importante é que colla xa os maiores de 60 coa cuarta dose posta e o sistema inmune a punto.
"Hai persoas que están atrasando acudir vacinarse, están dubidando. Non deben dubidar. Deben poñer esa cuarta dose porque van estar moito máis protexidos. É importante cubrirse con esta vacina bivalente", recomenda o experto en epidemioloxía.
