Os bombeiros da provincia de Lugo inician unha folga indefinida

Os arredor de 120 bombeiros dos seis parques comarcais da provincia de Lugo inician este venres unha folga indefinida. Reclaman que o consorcio os recoñeza como persoal laboral fixo e mellora das condicions laborais. Se non hai resolución ao conflito, a próxima semana todos os parques comarcais de Galicia sumaranse ao paro indefinido.

Héctor Fernández, bombeiro do parque comarcal de Vilalba, di que en salarios e medios técnicos están á cola de España. "Somos os que máis traballamos, pero cando chega a nómina estamos 600 euros por debaixo de calquera bombeiro de España".

Tamén esixen renovación de medios materiais e máis contratacións. Din que os servizos mínimos demostran a carencia de efectivos humanos. Lucas Ares, bombeiro de Vilalba, afirma que traballan "en precario" e que o mesmo consorcio estalles a dar a razón ao determinar uns servizos mínimos de tres bombeiros, que é o retén que traballa habitualmente.

Deciden ir á folga ante a falta de avances na mesa de negociacións. Héctor Fernández di que "o servizo sempre funcionou grazas á boa vontade dos bombeiros, que sempre cubriron os mínimos sen mirar o tempo que botaban nin os cartos que gañaban, e agora o que pedimos é que senten a negociar coa mesma boa fe que temos nós durante todo o ano". 

Se non hai acordo co Consorcio, formado ao 50 por cento por deputacións provincias e Xunta, a próxima semana uniranse ao paro indefinido todos os parques comarcarcais de Galicia.