Os afectados por un ictus piden un plan que unifique a atención da fase crítica coa rehabilitación
Consideran fundamental que a primeira fase da rehabilitación se faga xa no hospital
Enrique tivo un ictus hai tres meses. A súa experiencia sanitaria como farmacéutico axudoulle a caer na conta do que lle pasaba e pedir axuda axiña.
Valora moi positivamente esta resposta sanitaria de urxencias, pero considera que na fase hospitalaria hai unha gran falta na atención que precisan os pacientes de ictus unha vez superada a crise inicial.
Considerou que nesas condicións non podía volver á súa casa e demandou unha prolongación do seu ingreso ata lograr unha mobilidade mínima. Tras catro semanas de rehabilitación no propio hospital, a súa situación era moi distinta.
Segue indo a rehabilitación, tanto aos servizos do hospital como aos de Sarela, a Asociación de Dano Cerebral de Santiago, para recuperar a psicomotricidade fina e superar certas dificultades na fala. E de paso colabora coa entidade para reivindicar que o bo nivel de asistencia aos pacientes de ictus se manteña máis aló da fase crítica.
