Orozco reclama revisar os votos das agrupacións locais do PSdeG tras quedar fóra da lista ao Senado
O exalcalde lucense asegura que "non lle dan os números" e di ter máis apoios da militancia que César Mogo, afín a Pedro Sánchez, que ocupará o posto ao que aspiraba Orozco
O alcalde de Láncara dimite da xestora do PSdeG lugués en desacordo coa xestión das direccións provincial e autonómica do partido
Besteiro di que se Orozco non vai nas listas do PSOE de Lugo, é por "datos verificables"
López Orozco, xunto ao exconselleiro Ricardo Varela, na asemblea do PSOE lugués do pasado martes (TVG)
O exalcalde socialista de Lugo José López Orozco manifestou o seu "desacordo" coa configuración das candidaturas do PSOE ao Congreso e ao Senado pola provincia para as próximas eleccións xerais aprobada polo comité provincial do PSOE, e reclamou unha revisión dos resultados ao asegurar que "as cifras non coinciden".
En concreto, Orozco quedou fóra da candidatura á Cámara alta, posto para o que se postulara nos últimos días, e César Mogo, próximo a Pedro Sánchez, volverá ser o número un dos socialistas ao Senado por Lugo. Sobre iso, fontes consultadas por Europa Press sinalaron que no comité provincial trasladouse que Mogo recibira moitos máis apoios que Orozco para ocular o posto.
O exrexedor tivo un importante respaldo na votación celebrada na asemblea local da cidade de Lugo, recuperando así nos últimos días presencia política tras deixar a alcaldía da cidade en 2015, obrigado polo seu partido. Ademais, enarborouse como unha figura "con forza" para poder competir por aumentar a súa representación na Cámara Alta.
Con todo, Orozco asegurou que "non lle dan os números".
"Por desgraza, non temos tantos afiliados para chegar ao número de votos que di o partido", asegurou.
Por iso, polo momento pediu, xunto ao grupo de militantes que impulsou o seu regreso, unha revisión das votacións.
Oferta de Lara Méndez
Ademais, relatou que Lara Méndez lle comunicou antes da votación que César Mogo era o que máis apoio tiña, e que lle ofreceu como alternativa ir de número dous ao Congreso, algo que el rexeitou, ofrecendo pola contra ser número 2 no Senado. Segundo López Orozco, a esa conversación que se fixo a través de mensaxería telefónica, non chegou a recibir contestación.
Neste sentido, asegura que conta con máis apoios que Mogo, entre 40 e 50, pero que aceptaba ir de número 2 "polo ben do partido", aínda que non esperaba quedar fóra das listas.
A agrupación provincial escolleu para a Cámara Alta, tras Mogo, á concelleira lucense Ana González Abelleira e de número 3 a Roberto Castro González, alcalde de Ribas de Sil.
No Congreso Patricia Otero lidera a lista, por diante de Jorge Bustos, Eva Blanco e Ismael Carracedo.
Malestar e dimisións
A exclusión de López Orozco provocou malestar entre as bases de numerosas agrupacións da provincia. Ademais, o alcalde de Láncara, Darío Piñeiro, anunciou que dimite como membro da xestora provincial polo seu desacordo coa xestión das direccións provincial e autonómica do partido.
