Os xulgados blíndanse para acoller os detidos na operación antidroga da fin de semana en Ferrol

Os detidos foron chegando das comisarías de Ferrol e da Coruña ao longo de toda a mañá. O operativo desenvolveuse durante a fin de semana. O dos Chaquetas é un dos campamentos activos na zona de Ferrol e Narón, considerado como o principal foco de venda de drogas a pequena escala do norte de Galicia. A trasfega de compradores de estupefacientes intensifícase os venres e os sábados.

O operativo rematou cun gran número de detidos. Segundo algunhas fontes, 14 persoas. No poboado, situado na parte posterior dunha gran superficie de roupa deportiva, consérvase o costume de manter acendida unha fogueira no medio das casetas, un sinal para os clientes de que hai actividade, que tamén utilizan para desfacerse da droga dunha forma rápida cando aparece a policía.

Participaron na redada as unidades de intervención policial, cunha ampla despregadura de medios, que incluíu un helicóptero. Entre eles figuraban os grupos operativos especiais de seguridade da Coruña e Bilbao.

A última redada de magnitude no poboado dos Chaquetas tivo lugar hai pouco máis dun ano e, nesa ocasión, rematou con 16 detencións e a incautación de 120 gramos de cocaína, diñeiro en efectivo, seis armas longas do calibre 12 e unha pistola eléctrica.

A Policía Nacional encadea varias operacións contra o narcotráfico na zona en apenas cinco meses. As diferentes detencións e incautacións impediron que estupefacientes por valor de máis dun millón de euros chegasen ao mercado negro.