Ómicron engade incerteza a unha curva pandémica que segue en ascenso
A incidencia media en Galicia é hoxe de 187 casos por 100.000 habitantes a 14 días
Os indicadores apuntan a que o número de infectados seguirá medrando dúas semanas máis
A aparición da variante ómicron enche o escenario de novas incertezas.
"Neste momento é moi complicado dicir a situación que imos ter no Nadal", lamenta Juan Gestal, experto en pandemias e catedrático de Medicina Preventiva e Saúde Pública.
Gestal cre que nos quedan polo menos dúas semanas ata acadar o pico de contaxios desta sexta onda, e a nova variante engade aínda máis incógnitas.
"Ómicron é unha variante de preocupación porque ten un número moi elevado de mutacións, máis de 50, e 33 están na espícula".
Quince delas, explica Gestal, están na zona de unión ao receptor, o que podería facer que esta cepa fose aínda máis transmisible.
"E tamén pode influír sobre o escape inmune que é o que máis nos preocupa: que as vacinas ou que inmunidade adquirida pola infección pasada non nos protexan adecuadamente fronte a esta nova variante do virus".
Gestal comenta que ómicron xa estaba circulando en Europa antes de ser descuberta en Suráfrica, e por iso aconsella axustar ben a máscara en interiores e usala sempre fóra cando non haxa distanciamento.
Tamén lembra a importancia de vacinarse. Preocupación cun só punto positivo: falta confirmación, pero parece que as infeccións por esta variante non son especialmente graves.
