O xuíz declara a Bolsonaro culpable de atentar contra o réxime democrático
Alexandre de Moraes asegura que o expresidente tentou instaurar unha ditadura tras perder contra Lula
O proceso, histórico en Brasil, podería sumar ata 40 anos de prisión en penas
O xuíz Alexandre de Moraes, relator do xuízo contra Jair Bolsonaro, considerou este martes o expresidente brasileiro culpable de tentar atentar contra o réxime democrático e de procurar instaurar unha “ditadura” tras a súa derrota electoral fronte a Luiz Inácio Lula da Silva en 2022.
O maxistrado tamén declarou culpables outros sete acusados, entre eles exministros e antigos xefes militares, nun caso que deberá ser decidido polos outros catro xuíces da Primeira Sala do Supremo.
A Fiscalía acusa a Bolsonaro e ao seu círculo de cinco delitos: intento de abolición violenta do Estado democrático de dereito, golpe de Estado, participación en organización criminal armada, dano cualificado e deterioración de patrimonio protexido.
Segundo os autos, mesmo se contemplou o asasinato de Lula, do vicepresidente electo, Geraldo Alckmin, e do propio De Moraes, nun plan a executar por seis oficiais do Exército.
Un plan desde 2021:“Bolsonaro constituíuse no líder dunha verdadeira organización criminal”
Durante cinco horas de exposición, Moraes repasou como Bolsonaro iniciou xa en 2021 unha campaña para sementar dúbidas sobre o sistema electoral, acusando xuíces de “canallas” e de querer “sabotar” os comicios. Esa estratexia, alimentada polo chamado “gabinete do odio” desde o Palacio do Planalto, derivou tras as eleccións en reunións conspiradoras, borradores de decretos para intervir no poder xudicial e chamadas ao Exército para impedir a toma de posesión de Lula.
Moraes ligou directamente esa trama cos campamentos fronte a cuarteis militares e co asalto ás sedes dos tres poderes do 8 de xaneiro de 2023, que cualificou non como un estoupido espontáneo, senón como o corolario dun golpe preparado desde 2021.
“Bolsonaro constituíuse no líder dunha verdadeira organización criminal”, afirmou o relator.
Tras o voto de Moraes, os outros xuíces da Primeira Sala pronunciaranse nun proceso que podería levar por primeira vez un expresidente brasileiro á prisión por intento de golpe de Estado.
O caso tivo eco internacional: Donald Trump, presidente dos EUA, defendeu a Bolsonaro, cualificou o xuízo de “caza de bruxas” e aplicou aranceis do 50 % a produtos brasileiros.
Washington tamén aprobou sancións económicas contra De Moraes e outros sete maxistrados do Supremo.
