O verán chega con temperaturas máximas en toda Galicia

Ás 10:24 desta mañá inaugurouse oficialmente o verán. E o día máis longo do ano e por suposto, a noite máis curta. E é tamén o día en que as zonas do planeta do hemisferio norte reciben a maior cantidade de horas de luz solar. É o solsticio de verán. 

"Astronómicamente é porque o sol ocupa a posición máis alta do ecuador celeste dentro da eclíptica. O que nos afecta é que é o día máis longo, a noite máis curta, o sol chega á máxima altura sobre o horizonte, máis de setenta graos de altura, e no mediodía, que en Galicia é sobre as dúas e media, prodúcense as sombras máis curtas de todo o ano", explica o astrofísico, Borja Tosar.

Metereoloxicamente o verán recala en Galicia de xeito contundente: con temperaturas que non baixaron dos 25 graos pola noite en varios puntos da Coruña e Pontevedra e que chega con previsións de máximas de 39 graos en Ourense e máis de trinta na maioría de Galicia.

"Comeza moi cálido. A previsión comeza con este exceso de calor no mes de xuño e probablemente cando remate nas estatísticas quedará que é un verán cálido, seguindo a tendencia dos últimos veráns", sinala María Souto, meteoróloga de Meteogalicia.

O mes de xuño está resultando un dos máis quentes rexistrados en Galicia nos últimos anos. Xa no verán do ano pasado rexistráronse vagas de calor de dezaseis días e ata corenta avisos por temperaturas extremas.

"No verán pasado tivemos máis da metade do período con algún tipo de aviso. Esa tendencia témola aí e parece indicar que nos vindeiros anos pode ser xuño ou xullo, mesmo non ten que pasar tódolos anos, pero semella que a frecuencia destes fenómenos extremos vai aumentar", remarca a meteoróloga, María Souto.

A vaga de calor proseguirá ata mediados da semana e acadará o seu máximo cara ao martes. Algo que desfrutarán os amantes das altas temperaturas. Para todos os demáis, sombra, hidratación e a poder ser algo de refresco.