O TS insta a Audiencia Nacional a investigar os pagos en metálico do PSOE a Ábalos e Koldo

O maxistrado do Tribunal Supremo que investiga o caso Koldo instou a Audiencia Nacional a que investigue os pagos en metálico que realizou o PSOE en favor do exministro José Luis Ábalos e o exasesor Koldo García.

Considera que puido cometerse un presunto branqueo de capitais a través das liquidacións de gastos e salienta que nin o partido nin os investigados nin os traballadores da formación que declararon como testemuñas esclareceron este asunto.

Nun auto, o instrutor Leopoldo Puente envía a investigación ao xuíz Ismael Moreno e faille chegar o informe da Unidade Central Operativa (UCO) da Garda Civil en que se recollen pagos en metálico, así como as declaracións do ex-xerente do partido e dunha traballadora de Ferraz sobre os pagos en efectivo.

Puente considera que non é o seu deber investigar os pagos en metálico realizados polo PSOE e exhorta o titular do Xulgado Central de Instrución Número 2 da Audiencia Nacional, Ismael Moreno, que xa indaga nunha liña de investigación relativa ao caso Koldo, que investigue se os investigados chegaron a branquear diñeiro a través das liquidacións de gastos do partido.

A xuízo do maxistrado, hai asuntos que non quedaron "despexados" sobre estes pagos e tampouco hai explicación "suficiente" da orixe das cantidades en metálico das que o partido político dispoñía na súa propia sede para facer fronte ás compensacións de gastos.

Segundo o xuíz, o PSOE non comprobaba que os gastos de Ábalos e de Koldo que se compensaban posteriormente non procedesen de diñeiro obtido de forma ilícita, co que, ao compensalos, estaríase a "branquear a súa procedencia". 

O PSOE asegura que demostrará na Audiencia Nacional a legalidade de todos os seus pagos

O PSOE reiterou este venres a súa máxima colaboración coa xustiza despois de que o Tribunal Supremo pedira á Audiencia Nacional investigar pagos en efectivo ao exministro José Luis Ábalos e a Koldo García, e avanzou que achegará a documentación bancaria que lle soliciten. Nun comunicado, o partido mostrouse a disposición dos tribunais para facilitar "todo o necesario para demostrar, con total claridade, que se está actuando conforme á lei en cada paso" e lembra que durante a investigación deste caso xa achegaron a documentación correspondente solicitada polo Supremo.

O xuíz remitiu ao xuíz da Audiencia Nacional Ismael Moreno -que tamén investiga o caso Koldo- o informe da UCO no que apuntou a existencia de discordancias entre os ingresos de José Luis Ábalos e as cantidades declaradas polo PSOE, así como a información remitida por ese partido para que decida se merece ser investigado.

O PSOE subliña que achegarán toda a documentación que lles reclame a Audiencia Nacional co fin de "acreditar que cada liquidación de gastos está debidamente xustificada e responde unha documentación certa". Nese sentido, farán chegar a documentación bancaria de "todo o efectivo utilizado" para responder á liquidación de gastos procede da conta bancaria do PSOE.

"Todo o efectivo abonado polo PSOE ten unha rastrexabilidade certa e legal, sen a existencia de descadres ou liquidacións non anotadas", defenden.

Desde Ferraz aseguran que o comportamento do PSOE "sempre foi escrupulosamente legal, sen que se cometeu ningunha actividade ou practicado ningún comportamento que poida ser considerado irregular, e moito menos delituoso".

O PP cre que demostra que Sánchez mentiu no Senado

A portavoz do PP no Congreso, Ester Muñoz, afirmou este venres que a decisión do xuíz do Tribunal Supremo (TS) de pedirlle á Audiencia Nacional que investigue os pagos en efectivo por parte do PSOE a José Luis Ábalos e Koldo García demostra que o presidente do Goberno, Pedro Sánchez, mentiu na súa declaración do xoves no Senado.

Nunha rolda de prensa no Congreso, Muñoz dixo que a petición do xuíz explica por que Sánchez "mentiu" ou "non quixo dar explicacións" a moitas das preguntas que se lle fixeron na comisión de investigación.

Segundo Muñoz, ata o de agora o financiamento irregular "sobrevoaba" ao Partido Socialista e esta decisión do xuíz "aterra ese financiamento irregular na porta de Ferraz".

O 24 de outubro, lembrou Muñoz, o PSOE mandou información ao Tribunal Supremo para acreditar os gastos, pero o auto este venres "deixa claro que non acreditaron nada".

Isto demostra, ao seu xuízo, que Sánchez no interrogatorio "tiña silencios porque está a preparar non a súa defensa ante a comisión de investigación, senón a súa defensa xudicial".