O Pentágono advirte de que hoxe será "o día máis intenso" de ataques en Irán

O secretario de Guerra dos EUA, Pete Hegseth, adiantou que este martes será o día máis intenso de bombardeos en Irán desde o inicio da guerra e afirmou que a capacidade de resposta de Teherán reduciuse mentres avanza a ofensiva, enfocada tamén contra a industria de defensa iraniana.

"Hoxe será, unha vez máis, o noso día máis intenso de ataques dentro de Irán: a maior cantidade de cazas, a maior cantidade de bombardeiros, a maior cantidade de ataques", dixo Hegseth nunha rolda de prensa no Pentágono.

Segundo o secretario de Defensa, "nas últimas 24 horas" a República Islámica "lanzou a menor cantidade de mísiles da que foi capaz ata o de agora".

Desde que os Estados Unidos e Israel iniciaron a operación Furia Épica o pasado 28 de febreiro, os ataques alcanzaron 5.000 obxectivos en territorio iraniano, o que resultou nun "avance significativo" na redución dos lanzamentos de mísiles e drons procedentes de Irán, afirmou o mando militar estadounidense.

O xefe do Estado Maior Conxunto dos EUA, Dan Caine, reiterou que os ataques con mísiles balísticos desde Irán manteñen "unha tendencia á baixa do 90 % respecto a cando comezaron, e os drons de ataque unidireccional diminuíron un 83 % desde o inicio da operación".

Caine informou de que comezaron a atacar "o complexo militar e industrial iraniano" centrándose en fábricas de drons kamikazes para "destruír o núcleo da súa capacidade autónoma". No medio dos bombardeos en resposta de Irán a países da rexión onde os EUA manteñen presenza diplomática e militar, o xefe militar estadounidense afirmou que seguen utilizando cazas e helicópteros de ataque para interceptar drons inimigos.

Preguntado sobre o novo líder supremo iraniano, Mojtaba Jameneí, fillo do falecido Alí Jameneí; e sobre  as súas supostas feridas en combate, Hegseth non quixo facer comentarios pero si advertiu que sería prudente que o relixioso tomase en serio as ameazas do presidente Donald Trump e non desenvolvese armas nucleares.

"Atopámonos nunha posición moi sólida", repetiu o xefe do Pentágono, quen con todo evitou dar unha predición precisa de cando poderían terminar os ataques.

O presidente estadounidense xustificou a ofensiva militar na suposta intención de Irán de "apoderarse de todo Oriente Próximo" e describiu ao país como un "tigre de papel" cuxas capacidades de defensa foron neutralizadas.

Irán responde que Ormuz será un estreito de paz ou de sufrimento

O secretario do Consello Supremo de Seguridade Nacional iraniana, Ali Lariyani, afirmou este martes que o estratéxico paso de Ormuz será un estreito de paz e prosperidade para todos ou de derrota e sufrimento para os belicistas, en referencia aos Estados Unidos.

“O estreito de Ormuz será un estreito de paz e prosperidade para todos ou un estreito de derrota e sufrimento para os belicistas”, dixo en X Lariyani.

A advertencia dunha das figuras políticas iraniana máis visibles nestes momentos prodúcese despois de que o presidente dos Estados Unidos, Donald Trump, advertise onte que se Irán bloquea o fluxo de petróleo no estreito de Ormuz o seu país “golpeará 20 veces máis forte” ao Estado persa do que o fixo ata o de agora.

Este estreito concentra unha quinta parte do tráfico marítimo de petróleo mundial, ademais de ser un punto neurálxico para o transporte de gas natural, fertilizantes e outros minerais críticos.

Os ataques a petroleiros e cargueiros que circulaban por Ormuz, que deixaron xa sete mariñeiros mortos, segundo cifras da Organización Marítima Internacional, máis as ameazas persistentes da Garda Revolucionaria iraniana de continuar con eles teñen o estreito practicamente pechado ao tráfico.

Todo iso contribuíu a elevar o prezo do petróleo ata niveis que non se vían desde 2022: o luns, o barril de brent, de referencia en Europa, chegou a rozar os 120 dólares, aínda que as declaracións posteriores de Trump de que contemplaba un fin próximo á guerra tiveron un efecto tranquilizador e ao fío do mediodía cotiza a menos de 93 dólares.