O temporal derruba parte da muralla de Lugo e causa problemas en 6 estradas

A muralla romana de Lugo sufriu un derrubamento esta noite na zona interior do monumento, na rúa do Moucho, entre as portas do Carme e de Santiago.

O desprendemento afectoulle a un treito duns seis metros de longo, que xa foi acordoado pola Policía Local. Por sorte, non hai feridos porque ninguén pasaba pola zona no momento no que se produciu a caída de pedras, ao fío das 23:30 horas.

Non é a primeira vez que o monumento, declarado Patrimonio da Humanidade, sofre danos por mor dos temporais. En 2002, as chuvias tamén estiveran detrás doutro desprendemento. Daquela, caeran uns dous metros cadrados da parede exterior da muralla.

Ademais, o temporal deixa importantes nevaradas que afectan á circulación en seis estradas na fronteira con Castela e León e nas zonas máis altas das provincias de Lugo e Ourense.

Imaxe de Víctor López Orozco

Estradas afectadas

Segundo informa a Dirección Xeral de Tráfico, no linde con León os camións non poden adiantar na N-6 entre O Castro e Brañas; e na ​​​A-6 dende Herrerías a Pedrafita do Cebreiro e, xa na provincia de Lugo, no treito ata San Pedro.

Na fronteira con Zamora, ocorre o mesmo na A-52 entre A Canda e O Padornelo e, na provincia de Ourense, dende este punto ata As Ferreiras. Tamén na N-525 da Canda a Valfarto. 

Pero a situación máis crítica está na OU-0704, entre Cabeza de Manzaneda e Cova, e na LU-633, de Pedrafita a Queixadoiro, onde os vehículos pesados teñen prohibido o paso e a velocidade está restrinxida a 60 quilómetros por hora. 

Aviso amarelo

Nesta xornada de transición, á espera de que entre unha nova fronte, as chuvias volveranse persistentes na franxa atlántica ao final do día.

A partir das 18:00 horas activarase o aviso amarelo por refachos máximos superiores aos 80 quilómetros por hora en todo o litoral e por vento no mar con intervalos de forza 8.

Tamén estará en nivel amarelo a Costa da Morte por ondas de ata cinco metros.